Joriy yilning 2 aprelida Buyuk Britaniyaning yuridik shaxslar reyestridan Telegram Messenger LLP kompaniyasi oʻchirildi. Ayni shu kompaniya Roskomnadzor tomonidan Telegram messenjerining egasi sifatida qayd etilgan edi.

Rossiya Aloqa, axborot texnologiyalari va ommaviy kommunikatsiyalar sohasi nazorati boʻyicha federal xizmati – Roskomnadzor mazkur kompaniyani axborot tarqatuvchi tashkilot sifatida roʻyxatga olgan edi. Undan mamlakat huquqni muhofaza etuvchi idoralariga foydalanuvchilarning muloqotlari shifrlash kalitlarini topshirishni talab etgan, ammo Telegram Messenger LLP buning imkoni yoʻqligini taʼkidlagani bois, Roskomnadzor ushbu messenjerni bloklashga urinib kelayotir.

Shunday qilib, yuqorida nomi keltirilgan kompaniya rasman yopildi, ammo Telegram messenjeri boshqa – Telegram Systems LLP nomiga oʻtkazildi. Uning kontakt va roʻyxatdan oʻtish maʼlumotlari Roskomnadzorda yoʻq, shuningdek, ushbu kompaniya uning roʻyxatida “maʼlumot tarqatuvchi tashkilot” tarzida qayd etilmagan ham.

Tabiiy savol tugʻiladi: boshqa yuridik shaxs nomiga oʻtkazilganidan soʻng, Telegramʻning holi nima kechadi? Roskomnadzor endi uni tinch qoʻyadimi yo yoʻqmi? Bu savollarga javoban Roskomnadzor matbuot kotibi Vadim Ampelonskiy shunday degan:

“Tasavvur qilingki, siz biznes yurityapsiz, kredit olgansiz va uni qaytarmayapsiz. Kreditorlar esa uni qaytarishingizni talab etishyapti. Siz bu muammoni yechish uchun, yuridik shaxs – kompaniyangizni yoʻq qilasiz. Xoʻsh? Boʻldimi? Endi sizning hech kimdan qarzingiz yoʻqmi?”

Ishqilib, shunaqa gaplar – Telegram ustidagi mojarolar hali-beri tugamaydigan koʻrinadi. Bu boradagi yangiliklardan birinchilar qatorida boxabar boʻlib borish uchun bizni kuzatishda davom eting.скачать dle 10.5фильмы бесплатно