“Barselona” futbol jamoasini sevib, unga muxlislik qiladiganlar O‘zbekistonda anchagina bo‘lsa kerak. Biror bir jamoaga muxlislik qilish yaxshi! Ammo ko‘pchilik muxlislar sevib, qo‘llab-quvvatlovchi o‘z jamoasining tarixini bilmasliklari mumkin. Mana masalan, “Barselona” futbol jamoasi qachon tashkil etilganligini bilasizmi? Millionlarning sevimli futbol jamoasi, ispaniya futbol klubi “Barselona” 1899-yil, 29-noyabrda tashkil qilingan. Ha, bugun “Barselona”ning “tug‘ilgan kuni”!

Klub tarixi haqida qisqacha

Ushbu futbol klubi shveysariyalik sportchi Joan Gamper tomonidan tashkil qilingan. Klubni tashkil qilish uchun Gamper 22-oktabrda mahalliy gazetalarning biriga e’lon beradi va mana shu e’lon tufayli klubga 11 kishi yig‘iladi. 29-noyabr kuni to‘planganlar ishtirokida ilk majlis bo‘lib o‘tadi va shu majlisda “Barselona” futbol klubiga asos solinadi. Gamper roppa-rosa 25 yil klubga rahbarlik qilgan. U nafaqat “Barsa”ning asoschisi, balki uning o‘yinchisi va prezidenti ham edi.

Ilk omadsizlik

“Barselona” 1899-yil 8-dekabr kuni angliyalik jamoaga qarshi ilk marta maydonga chiqqan. Ammo ilk match klubga muvaffaqiyat keltirmagan. “Barsa” o‘yinchilari maydonda jonbozlik ko‘rsatganiga qaramay, ular 0-1 hisobida yutqazib qo‘yishgan. Mana shu ilk muvaffaqiyatsizlik katta zafarga yo‘l ochdi: 1901-1902-yillarda jamoa o‘z tarixida ilk g‘oliblik kubogini qo‘lga kiritgan. 1901-yildan 1938-yillargacha “Barselona” 22 marta turnirlarda yutgan. 1912-yilda jamoaga taniqli futbolchi Paulino Alkantara kelib, 357 o‘yinda qatnashgan va ularning hammasida gol urib zafar qozongan. Bu futbol klubi tarixida rekord gollar edi va hozirgacha bu rekord buzilmagan.

Yulduzlar klubi

“Barselona” Ladislav Kubala, Yoxan Kroyff, Diyego Maradona, Xristo Stoichkov, Romario, Ronaldo va Luish Figu kabi mashhur yulduzlar o‘ynagan jamoadir. “Barselona” Ispaniyadagi eng ko‘p kubokka ega chiqqan klub (24 ta Ispaniya chempioni kubogi, 29 ta Ispaniya kubogi, 12 ta Ispaniya super kubogi va 2 ta Ispaniya ligasi kubogi) sifatida juda qadrlanadi.
Hozirda ushbu klub butun dunyoda va Yevropada eng yetakchi klublardan biri sanaladi. Klub “Mes que un club” (klubdan ko‘ra ko‘proq) shiori ostida haqiqatdan ham oddiy klubdan ko‘ra ko‘proq, kattaroq muvaffaqiyatlarni zabt etib kelmoqda.


скачать dle 10.5фильмы бесплатно