Surxondaryo viloyati ichki ishlar boshqarmasi qalbaki hujjatlar asosida biometrik pasportni qoʻlga kiritgan shaxsni aniqladi. U 1976-yil 20-may kuni tugʻilgan boʻlsa-da, soxta maʼlumot va hujjatlar asosida tugʻilgan yilini toʻqqiz yilga yoshartirib olishga erishgan.

Gap shundaki, ichki ishlar idorasida yollanma xodim boʻlib ishlaydigan fuqaro Malohat Joʻrayeva (ism-familiyasi oʻzgartirildi) fuqarolik ishlari boʻyicha Denov tumanlararo sudiga shikoyat ariza bilan murojaat etib, oʻzining 20.05.1976-yilda emas balki, 20.05.1985-yilda tugʻilganligini, tugʻilgan vaqtida otasi vafot etganligi sababli onasi oʻz vaqtida tugʻilganlik haqidagi guvohnoma olmaganini, 1999-yilda bobosi Sariosiyo tumani fuqarolik holati dalolatnomasini yozish boʻlimiga borib, eʼtiborsizlik bilan unga 1976-yilda tugʻilganlik haqida guvohnoma olganini maʼlum qilgan. Tugʻilganlik guvohnomasi va fuqarolik pasportida 1976-yilda tugʻilgan, deb koʻrsatilgan boʻlsa-da, oʻzi aslida 1985-yilda tugʻilganligini, yashagan manzilining qishloq vrachlik punkti va mahalla fuqarolar yigʻinining aholini roʻyxatga olish rasmiy kitobida 1985-yilda tugʻilganlar roʻyxatida turishini, maktabda ham 1985-yilda tugʻilgan tengqurlari bilan oʻqiganligini, bu holatni Sariosiyo tumanidagi 1-umumiy oʻrta taʼlim maktabni 16.06.2002 yilda bitirganlik haqidagi shahodatnomasi tasdiqlashini bildirgan.

Fuqarolik ishlari boʻyicha Denov tumanlararo sudi fuqaro M.Joʻrayevaning vajlarini qanoatlantirib, uning tugʻilgan yilini 1976-yildan 1985-yilga oʻzgartirish majburiyatini Sariosiyo tumani fuqarolik holati dalolatnomasini yozish boʻlimi boshligʻi zimmasiga yuklagan. Sudning hal qiluv qaroriga asosan, tuman fuqarolik holati dalolatnomasini yozish boʻlimi tomonidan M. Joʻrayevaga tugʻilganlik haqidagi guvohnoma dublikati berilgan boʻlib, unda 1985-yil 20-may kunida tugʻilganligi koʻrsatilgan boʻlsa-da, guvohnoma FHDYOBda mavjud dalolatnomalarni qayd etish kitobiga 1976-yil 11-iyun kuni 222- raqam bilan qayd etilganligi haqida yozib qoʻyilgan.

Biroq, surishtiruv ishlari natijasida fuqaro M. Joʻrayevaning Sariosiyo tumanidagi 1-umumiy oʻrta taʼlim maktabining 11-sinfini 1992/1993-oʻquv yilida tamomlagani aniqlangan. Shu sababli unga 1993-yilda AU №191376 seriya raqamli shahodatnoma berilgan. Ushbu hujjat M. Joʻrayevaning 1976-yilda tugʻilganligini tasdiqlaydi. Shuningdek, unga tegishli mehnat daftarchasining 2-3 betlarida u ilk mehnat faoliyatini boshlagan yillar qayd etilgan. Agar M. Joʻrayeva rostdan ham 1985-yilda tugʻilgan boʻlsa, u 12 yoshidan ishga qabul qilingan ekan-da, degan xulosa kelib chiqadi.

Ayni paytda mazkur holat yuzasidan tergovga qadar tekshiruv harakatlari olib borilmoqda.скачать dle 10.5фильмы бесплатно