Shavkat Mirziyoyev 2-dekabr kuni “Buyuk davlat va siyosat arbobi, O‘zbekiston Respublikasining Birinchi Prezidenti Islom Abdug‘aniyevich Karimov siymosi tasvirlangan haykalni yaratish bo‘yicha xalqaro ijodiy tanlovni tashkil etish to‘g‘risida”gi Prezident qarorini imzoladi. Qaror matni 6-dekabr, seshanba kuni O‘zA tomonidan e’lon qilindi.

Qaror “xalqimizning samimiy istaklari va xohish-irodasidan kelib chiqqan holda, ona Vatanimiz taraqqiyoti, el-yurtimiz manfaati yo‘lidagi unutilmas buyuk tarixiy xizmatlarini inobatga olib, O‘zbekistonning Birinchi Prezidenti, O‘zbekiston Qahramoni Islom Abdug‘aniyevich Karimovning xotirasini abadiylashtirish maqsadida” qabul qilingan.

“Mustaqil O‘zbekiston davlatining asoschisi, buyuk davlat va siyosat arbobi, o‘zbek xalqining ulug‘ va ardoqli farzandi, mamlakatimizning Birinchi Prezidenti Islom Abdug‘aniyevich Karimov Vatanimizni uzoq yillar davom etgan mustabid tuzum qaramligidan ozod qilib, halokat yoqasiga kelib qolgan yurtimizni qayta tikladi. Buyuk Yo‘lboshchimiz g‘oyat og‘ir va tahlikali vaziyatda turli qiyinchilik va mashaqqatlarga qaramasdan, tarixan qisqa davr mobaynida O‘zbekistonni jadal va barqaror sur’atlar bilan rivojlanib borayotgan zamonaviy demokratik davlatga aylantirdi. O‘zbekistonning Birinchi Prezidenti o‘zining serqirra siyosiy faoliyati, olijanob insoniy fazilatlari bilan Vatanimizning ko‘p asrlik tarixida o‘chmas va yorqin iz qoldirdi. U nafaqat O‘zbekiston, balki butun jahon miqyosida katta hurmat va obro‘-e’tiborga sazovor bo‘lgan ulkan shaxs va arbob sifatida tanildi”, — deyiladi qarorning kirish qismida.

Qarorda qayd etilishicha, xalqaro tanlovni o‘tkazish haqidagi taklif bilan O‘zbekiston Badiiy akademiyasi, Madaniyat va sport ishlari vazirligi, Toshkent shahar hokimligi, Fanlar akademiyasi, Respublika Ma’naviyat targ‘ibot markazi, Yozuvchilar uyushmasi va keng jamoatchilik chiqish qilgan va bu taklif ma’qullangan.

Qarorga muvofiq, O‘zbekistonning Birinchi Prezidenti Islom Abdug‘aniyevich Karimov siymosi tasvirlangan haykalni yaratish bo‘yicha Xalqaro ijodiy tanlovga tayyorgarlik ko‘rish va uni o‘tkazish bo‘yicha tashkiliy qo‘mita tasdiqlangan va unga O‘zbekiston bosh vazirining o‘rinbosari Abdulla Aripov rahbar etib tayinlangan.

Tashkiliy qo‘mita 15 kun muddatda xalqaro tanlovning tadbirlar rejasi, xarajatlar smetasi, nizomi, reglamenti va dasturini ishlab chiqishi va tasdiqlashi ko‘zda tutilgan. Shuningdek, Tashqi ishlar vazirligiga tanlov hamda unda ishtirok etish tartibi to‘g‘risidagi ma’lumotlarni xorijiy ijodiy tashkilotlarga 20 kun muddatda yetkazish haqida ko‘rsatma berilgan.

Qarorda qayd etilishicha, O‘zbekiston Badiiy akademiyasining buyurtmanomalariga binoan xalqaro tanlov doirasida xorijiy davlatlardan keltiriladigan yuklar bojxona to‘lovlaridan ozod qilinadi, tanlovning xorijiy qatnashchilariga kirish vizalari konsullik va boshqa yig‘imlar undirilmasdan rasmiylashtiriladi, “O‘zbekiston havo yo‘llari” milliy aviakompaniyasi esa tanlovning xorijiy qatnashchilari va unga aloqador yuklarni to‘lovlarning barcha turlaridan ozod qiladi.скачать dle 10.5фильмы бесплатно