4-dekabr kuni O‘zbekiston Respublikasi Prezidentligiga o‘tkazilgan navbatdan tashqari saylov ochiqlik va oshkoralik, tenglik va transparentlik tamoyillariga to‘la mos tarzda o‘tdi. Buni butun dunyodan kelgan kuzatuvchilar ham e’tirof etdi.

Saylovda 88.61 foiz ovoz to‘plab, g‘alabaga erishgan Tadbirkorlar va ishbilarmonlar harakati – O‘zbekiston Liberal-demokratik partiyasidan nomzod Shavkat Mirziyoyevning O‘zbekiston Respublikasi Konstitutsiyasi qabul qilinganligining 24 yilligi munosabati bilan o‘tkazilgan tadbirda so‘zlagan nutqi muhokamalarga sabab bo‘lmoqda. Qaysi davraga kirmang, suhbat mavzusi yo yangi yilning nomlanishiga, yo islohotlarning kengayishiga borib taqalmoqda. Albatta, odamlar davlat va jamiyat hayotidagi o‘zgarishlardan mamnun. Xususan, O‘zbekiston xalq yozuvchisi Xudoyberdi To‘xtaboyev ham.

Xudoyberdi To‘xtaboyev, O‘zbekiston xalq yozuvchisi:

— Muloqotsiz, fikr almashuvlarsiz taraqqiyot bo‘lmaydi. Xalq bilan muloqot – bu ikki tomonlama fikrlashuv, muammolarga yechim topish, aholining davlat boshqaruvidagi rolini oshirish demak. Prezidentimiz Shavkat Mirziyoyev bu borada xalqimiz qalbidagi katta bir orzuni aytdi: “Xalq davlat idoralariga emas, davlat idoralari xalqimizga xizmat qilishi kerak va bu haqiqatni avvalo barcha bo‘g‘indagi rahbarlar yaxshi tushunib olishi zarur”. Asli demokratiya deganlari shu: xalq huquq-manfaatlarining asosiy rolga chiqishi – kuchli davlat va kuchli fuqarolik jamiyati qurishning mustahkam omili.

Prezidentimiz yosh avlod tarbiyasi haqida gapirib, Abdurauf Fitratning “Xalqning aniq maqsad sari harakat qilishi, davlatmand bo‘lishi, baxtli bo‘lib izzat-hurmat topishi, jahongir bo‘lishi yoki zaif bo‘lib xorlikka tushishi, baxtsizlik yukini tortishi, e’tibordan qolib, o‘zgalarga tobe va qul, asir bo‘lishi ularning o‘z ota-onalaridan bolalikda olgan tarbiyalariga bog‘liq”, degan fikrlarini barchamizga bejiz eslatmadi. Bu oilaviy kitobxonlik darajasini oshirish bilan chambarchas bog‘liq. Chunki oilaviy kitobxonlik nafaqat oilalarda, balki butun jamiyatda o‘zaro bir-birini tinglash-anglash qobiliyatini yuksaltiradi, o‘zaro muloqot va fikrlashish madaniyatini yanada oshiradi.

Ma’ruzada yoshlarni turli yovuz xavf-xatarlardan asrash borasida ham nihoyatda og‘riqli bir masala kun tartibiga qo‘yildi. “Bolalarimizni birovlarning qo‘liga berib qo‘ymasdan, ularni o‘zimiz tarbiyalashimiz lozim”, deyildi. Yoshlar bilan ko‘proq gaplashish, ularning qalbiga quloq solish, dardini bilish, muammolarini yechish uchun amaliy ko‘mak berishda ijodkorlarimiz ham kamarbasta bo‘lishini istardim. Chunki tabiatda ham, jamiyatda ham bo‘shliq bo‘lmaydi, yoshlar qalbi uchun kurashish – kelajak uchun kurashish demakdir.скачать dle 10.5фильмы бесплатно